كل قطرة دم بشرياني تهتف باسمك يا حسين
روحي اشلون تظل بجسمي من اذكر جسمك يا حسين
جسمي مو اغلى من جسمك دمي مو أغلى من دمك
*******************
يا هل العايش على ارموشي حلم كل لحظة يتجسم
سحر شوقك يا بو الأكبر يسايرني بخلايا الدم
جسد و اتمثلك كوكب اصد لجروحك اتوهم
أشوفن كل جرح منك ثغر للدنيا يتبسم
عجيبة تندبح ضامي يا من كل عين الك زمزم
و الأعجب تنزف اجروحك و أنت الكل جرح بلسم
دنيانة المشغوفة بحبك بيك اتغنت يا حسين
مو بس العابس جنيته كلها انجنت يا حسين
كلها غدت تلهج باسمك دمي مو أغلى من دمك
*********
لون عابس وقف بالطف يصيح الشوق جنني
ملايين أصبحت مثله لونك عنها تسألني
عِشاكَة و كل فرد منهم غِدى بعابس يذكرني
و كلمن انشده يجاوب يقول احسين هيمني
و أنا بعالم لهيب الطف سيوف الهم يبارنّي
عجيبة يوذرنّ جسمك و لا مثلك يوذرّني
شبهت اجروحك بعيوني و الدم يجري يا حسين
و الحافر ما هشّم صدرك هشّم صدري يا حسين
و آنا ريت انصرع يمك دمي مو أغلى من دمك
***********
حليف الهم كلف يقدر دليله بصبره يتورع
على مصابك يا بو اليمة وراعة قلبي ما تنفع
تريد اصبر اشبعد اصبر و اشوفك دامي بالمصرع
اشتظن جفن المحب يغفى و حبيبه اعلى الثرى مقّطع
يا بو الأكبر لون يذبُل نخبره بحلك و يسمع
يفتت كل صخر غيضه و يجود اعليك بالمدمع
لو يسمع بمصابك يذبُل جَان اتفطر يا حسين
و اشلون آنا العاشق و اصبر بيش اتصبر يا حسين
و آنا همي بكثر همك دمي مو اغلى من دمك
*********
الحديد اتلين الداوود عجيبة اعليك يتصلب
و يصير اسيوف و يقطع جسد فوق الثرى امخضب
الشمس لو مر عليها الغيم بثياب الخجل تتحجب
اشعجب ما غابت و جسمك تشوفه بكربله مترب
عجيبة الماي ظل يجري و لا عن خجل يتنضب
و يشوفك ضامي و بكتره دليلك بالعطش يلهب
بهذا الماي اشلون اتهنا و قلبك ضامي يا حسين
اشلون اتنام الليل اعيوني و جسمك دامي يا حسين
بروحي و بدمي أخدمك دمي مو أغلى من دمك
*********
لون خيّم عليّ ليلي بسواد العاشر اتذكر
صور عن ليلة العاشر اعيش وياها و اتحسر
اعانكَ لجمة اجروحي بفضاوة قلبي و اتصبر
و لا صحوة سِمه بعيني تريضني يا بو الأكبر
سوادت ليلي ترسم لي وداعك ويه هالحدر
و اشد اعلى الحزن حيلي لون خيط الفجر أسفر
كل مصباح اتذكر يومك يوم العاشر يا حسين
بس موجات المدمع ترحم قلبي الشاجر يا حسين
دمعي دم يجري و يكلمك دمي مو اغلى من دمك
*********
صرت كلما أصد للنار أذكر جمرة اخيامك
و لون اسمع طفل يبجِي أنوحن و أذكر أيتامك
و إذا مني عضو اتألم أهيم بسجَت ألآمك
و إذا يومي يخالفني أون لمخالف أيامك
أنا و كل اهلي و اصحابي نذر لتراب أجدامك
يا غالي و أغلى من عمري رخيصة اعيوني جدامك
روحي و جسمي و شما املك باسمك صاحن يا حسين
و كل ذرات العالم مثلي لجلك ناحن يا حسين
دمي لو تطلب أسلمك دمي مو أغلى من دمك
منثقول من صديقي
